Letste neijs:
JWB/tienerbal
Idder jaor op vriedigaovend vûr de carnaval wurd in Beringe ut Tienerbal gehaoije. Ut Tienerbal wurd georganiseerd door CV de Beringse Kuus en ut Jeugd Werk Beringe vûr de jeugd vanaaf groep 7 van de basissjoel tot en mèt 15 jaor. De aovend begint um halluf acht en deurt tot illuf euver tien.
Ut Tienerbal is ontstaon vanoeht de gedachte det ut belangriek is det carnaval onger de aandacht blieft van de jeugd die zich te groëht vinge veur ut kingerbal. Ut irste initiatief is genome door CV de Beringse Kuus. Toen in 2002 ut Jeugd Werk Beringe woort opgerich, hebbe dees vereiniginge de heng in ein gesjlaage. In de irste jaore waas zaal Vios de vaste stek. Nao de opening van de neije Wieksjlaag in 2007 kon gebroek gemakt waere van unne groëtere zaal en podium en is ut Tienerbal oethgegruid tot een carnavalsfiëst waor de jeugd oeht de Piël en Maas regio elkaar kin treffe.
Op ut Tienerbal kin geswingd en gehost waere, mèr alcohol det wurt der neet getapt. Door de inzet van vrijwillgers van de Kuus en ut JWB is ut meugelik det de aovond entreevreij is en kin de consumptiepriehs liëg gehoaije waere.
De samenwirking tusse de Beringse Kuus en ut Jeugd Werk Beringe heet in 2008 geleid tot ut oehtroope van unne jeugdprins en prinses mèt unne ganse raod van illuf. Dit heet nog un extra zètje gegeave aan ut Tienerbal als ontmoetingsplaats vûr de jeugdcarnavalscompeneij oeht alle durpe van ôs gemeinte.
Wea kinne inmiddels wel zegge dat ut Tienerbal unne vaste plek heet gekrege op de carnavalsagenda.
